Рэспубліканскі ландшафтны заказнік Ельня
У цэнтры Мёрскага раёна размяшчаецца адна з найважнейшых славутасцяў краю – балота Ельня. З мэтай захавання ў натуральным стане расліннага і жывёльнага свету балотнага масіву, які адносіцца да ліку найрэдкіх у Еўропе, у 1968 г. быў утвораны гідралагічны заказнік рэспубліканскага значэння «Ельня», у 2007 г. атрымаў статус Рэспубліканскага ландшафтнага заказніка «Ельня».
Ельня з'яўляецца самым буйным верхавым балотам у Беларусі і адным з найбуйнейшых у Еўропе азёрна-балотных комплексаў. Агульная плошча заказніка складае 25 301 га, з іх плошчу 18 794 гектары займае балота Ельня.
У цэнтральнай частцы балота размешчаны Вялікі Еленскі востраў, які аб'ядноўвае групу даволі буйных астравоў. На Ельні бяруць пачатак пяць рэк: Ельнянка, Беража, Волта, Вянужка і Графскі ручай. На тэрыторыі балота знаходзіцца больш за 100 дзіўных па прыгажосці азёр. Цэнтральная частка балота з азёрамі, што знаходзяцца ўнутры яго, узвышаецца на 7 метраў над перыферыйнымі ўчасткамі і на 130-145 метраў над узроўнем мора.
