Міёрскія ратавальнікі праводзілі калегу на заслужаны адпачынак

Калектыў ратавальнікаў Міёрскага раённага аддзела па надзвычайных сітуацыях з гонарам правёў на заслужаны адпачынак старэйшага інструктара-ратавальніка пажарнага аварыйна-выратавальнага паста №12 старэйшага прапаршчыка ўнутранай службы Маслякова Уладзіміра.

Сыход на заслужаны адпачынак - асаблівая падзея ў жыцці кожнага чалавека. Пройдены вялікі адрэзак жыццёвага шляху, зроблены важныя адкрыцці і ўчынкі. Надыходзіць час падвесці вынікі і пажынаць плады сваёй дзейнасці.

Як адзначыў начальнік аддзела Віталь Ганін, Уладзімір Уладзіміравіч аддаў службе ў МНС больш за 31 год. Заўсёды добрасумленна ставіўся да выканання сваіх абавязкаў, выконваў любую даручаную справу, дзяліўся вопытам з маладымі работнікамі. За прафесіяналізм і адданасць справе неаднаразова ўзнагароджваўся граматамі і атрымліваў падзякі.

Словы падзякі за добрасумленную працу на адрас віноўніка ўрачыстасці прагучалі не толькі ад начальніка аддзела. Да слоў віншавання далучыліся намеснікі начальніка, начальнік аварыйна-выратавальнага паста, на якім праходзіў службу Уладзімір Уладзіміравіч. Работнікі і кіраўніцтва аддзела падзякавалі ўжо пенсіянера за вернасць і адданасць прафесіі і пажадалі далейшых поспехаў на жыццёвым шляху.