Не папоўніце статыстыку «горшных курцоў»

Міёрскія ратавальнікі ў рамках рэспубліканскай прафілактычнай акцыі «Не прапальвай сваё жыццё» разам з юнымі памочнікамі правялі мерапрыемства ў краме «Санта», нагадалі жыхарам і гасцям горада пра шкоду курэння і пра тое, што яно часта з'яўляецца прычынай пажараў і гібелі людзей на іх.

«Не прапальвай сваё жыццё» — з такім заклікам звярталіся арганізатары акцыі да наведвальнікаў. Каб прыцягнуць увагу да праблемы гібелі людзей на пажарах з-за курэння, прапаноўвалася паўдзельнічаць у конкурсах. За паспяховае праходжанне полагаўся салодкі прыз. Чым складанейшае заданне, тым прыз істотнейшы. Заадно кожны для сябе асабіста вызначыў, якія здольнасці ў яго развіты.

Асноўная мэта мерапрыемства — нагадаць не толькі пра шкоду курэння ў прынцыпе, але і папярэдзіць, што курэнне ў ложку ў стане алкагольнага ап'янення — частая прычына гібелі людзей. На жаль, сумная статыстыка такіх «горе-курцоў» па краіне рэгулярна папаўняецца новымі імёнамі. Каб не апынуцца ў гэтым спісе, дастаткова задумацца пра здароўе і перастаць паліць.

Наведвальнікі, якія прынялі ўдзел у акцыі, атрымалі не толькі памяткі пра шкоду курэння, але і карысныя веды пра шкодную звычку.