Рэкапетры па вадаёмах працягваюцца

Свежае паветра, сонца і купанне не толькі прыносяць задавальненне, але і служаць добрым сродкам для загартоўвання арганізма. Аднак, вада не так бяспечная, як можа здацца на першы погляд, яна рэгулярна і бязлітасна забірае чалавечыя жыцці.

Міёрскія ратавальнікі сумесна з работнікамі АСВОД працягваюць наведваць вадаёмы раёна з мэтай прафілактыкі і прадухілення няшчасных выпадкаў на вадзе. Пад пільнай увагай не толькі абсталяваныя пляжы, але і месцы, не прызначаныя для купання.

Падчас рэйду з адпачывальнікамі праводзіцца тлумачальная прафілактычная праца аб выкананні правілаў паводзін на вадаёме, папярэджання няшчасных выпадкаў. Акцэнтавалі ўвагу на недапушчальнасці знаходжання паблізу вадаёмаў і купання ў стане алкагольнага ап'янення, а таксама не абышлі бокам і тэму наяўнасці дзяцей на вадаёме без нагляду дарослых, бо нават некалькі секунд неўважлівасці і халатнасці бацькоў могуць прывесці да трагічных наступстваў.

Карысныя парады ратавальнікі падмацавалі інфармацыйнымі памяткамі і буклетамі па выкананні элементарных правілаў бяспекі, нагадалі, што ў выпадку, калі неабходна дапамога, неадкладна тэлефануйце 101 ці 112.