Аб паліве

З прычыны ўсталяванага спякотнага надвор'я пад пагрозай засыхання апынуліся зялёныя насаджэнні, высаджаныя ў населеных пунктах у вясновы перыяд гэтага года, а таксама ў папярэднія гады. Без дапамогі чалавека большасць маладых дрэў і кустоў асуджана на хуткую гібель.

У сувязі з гэтым Міністэрства прыродных рэсурсаў і аховы навакольнага асяроддзя аб'яўляе экстранную акцыю «Палі дрэва – захавай яму жыццё!». Мерапрыемства пройдзе ва ўсіх населеных пунктах Беларусі. Кожны жыхар рэспублікі можа ўнесці свой уклад у захаванне маладых зялёных насаджэнняў.
Ваду для паліву пажадана браць з адкрытых крыніц, каб яе тэмпература была блізкая да тэмпературы глебы. Звычайна паліў праводзяць раніцай ці ўвечары, каб вада менш выпароўвалася. Паліў дрэў праводзіцца з разліку 30–50 л на 1 м2 прыствольнай плошчы, кустоў – 20 л на 1 м2, але ў засушлівы час вада будзе карысная дрэвам у любой колькасці. Спачатку неабходна паліць верхні пласт глебы для яго змочвання, а затым паліць больш інтэнсіўна.

У сухое і спякотнае надвор'е дрэвы рэкамендуецца паліваць кожны тыдзень, калі дрэвы пасаджаны нядаўна, то яны патрабуюць больш частых паліваў.
Напамінаем пра артыкул 55 Канстытуцыі Рэспублікі Беларусь, згодна з якім ахова прыроднага асяроддзя і беражлівае стаўленне да прыродных рэсурсаў – абавязак кожнага. Не заставайцеся абыякавымі, паліце дрэвы, кветкі, кусты каля свайго дома, працы, навучальнай установы, у парках, алеях і скверах!