Міёрскі раённы выканаўчы камітэт
Прэзідэнт Беларусі Аляксандр Лукашэнка прыбыў з рабочым візітам у Кыргызскую Рэспубліку, у сталіцы якой, Бішкеку, 13 кастрычніка адбудзецца пасяджэнне Савета кіраўнікоў дзяржаў СНД, перадае карэспандэнт БЕЛТА.
Падзея традыцыйна пройдзе ў вузкім і пашыраным складзе. Кіраўнік дзяржавы прадставіць пазіцыю і прапановы Беларусі па найбольш актуальных пытаннях узаемадзеяння ў рамках Садружнасці.
Чакаецца, што лідары краін СНД прымуць шэраг сумесных заяўленняў.
На павелічэнне патэнцыялу Садружнасці і павышэнне яе ролі на міжнароднай арэне накіравана пытанне парадку дня аб усталяванні статусаў назіральніка і партнёра СНД.
Запланавана таксама ўнясенне шэрагу змен у прававыя акты СНД, абмеркаванне пытанняў актуальнай праблематыкі па шырокім спектры тэм.
На баках саміта будуць абмяркоўвацца і пытанні двухбаковага супрацоўніцтва паміж краінамі - у ходзе сустрэч, перамоў і ўзаемадзеяння кіраўнікоў дзяржаў.
Перад самітам у Бішкеку адбылося пасяджэнне Савета міністраў замежных спраў (СМІЗ) краін СНД. Ад беларускай стараны ў ім прыняў удзел кіраўнік МЗС Сяргей Аленьнік.
СМІЗ зацвердзіў чатыры праекты сумесных заяўленняў Савета кіраўнікоў дзяржаў СНД. Сярод іх — праект Заяўлення аб прынцыпах міждзяржаўных адносін у шматпалярным свеце. У дакуменце адлюстроўваецца агульны погляд аб важнасці фарміравання ўстойлівага шматпалярнага мірапарадку, заяўляецца намера садзейнічаць стварэнню бяспечнай архітэктуры міжнародных адносін для вырашэння праблем міжнароднага і рэгіянальнага развіцця, падкрэсліваецца імкненне ператварыць рэгіён Садружнасці ў прастору міру, устойлівага развіцця і сумеснага дабрабыту, пацвярджаецца адкрытасць СНД для шырокага міжнароднага супрацоўніцтва.
Як інфармуе прэс-служба Выканаўчага камітэта СНД, на саміце 13 кастрычніка таксама плануецца падпісаць Дагавор аб заснаванні ў СНД Міжнароднай арганізацыі па рускай мове, Пагадненне аб стварэнні Міжнароднага цэнтра ацэнкі рызык легалізацыі (адмывання) даходаў, атрыманых злачынным шляхам, і фінансавання тэрарызму і Пагадненне аб стварэнні Каардынацыйнага савета дзяржаў — удзельніц Садружнасці Незалежных Дзяржаў у сферы судова-экспертнай дзейнасці.
Запланавана падпісанне Міждзяржаўнай праграмы сумесных мераў барацьбы з злачыннасцю на 2024–2028 гады і заснаванне ў Садружнасці медаля «За ўклад у умацаванне міру».
Таксама чакаецца, што кіраўнікі дзяржаў СНД прымуць рашэнне аб абвяшчэнні Самарканда (Узбекская Рэспубліка) Культурнай сталіцай Садружнасці ў 2024 годзе.
Крыніца: belta.by