Ход рэканструкцыі аб'ектаў да «Дажынак» пракантраляваў Ігар Сяргеенка
Таксама ў зоне ўвагі Старшыні Палаты прадстаўнікоў, упаўнаважанага прадстаўніка Кіраўніка дзяржавы ў Віцебскай вобласці Ігара Сяргеенкі – аб'екты, запланаваныя да здачы ў рамках падрыхтоўкі да абласнога фестывалю-кірмашу працаўнікоў вёскі «Дажынкі-2026».
Спікер праінспектаваў ход работ на плошчы Леніна, дзе пройдуць асноўныя мерапрыемствы свята, у памяшканнях будучай залы бокса, дзе ідуць рэканструкцыя і будаўнічыя работы. Будынак СШ № 3 імя Героя Савецкага Саюза Е. Томка ўжо мае завершаны эстэтычны выгляд, працягваецца добраўпарадкаванне тэрыторыі школы.
На абласным штабе пад кіраўніцтвам Ігара Сяргеенкі з удзелам старшыні абласнога Савета дэпутатаў Дзмітрыя Дзямідава і намеснікаў старшыні Віцебскага аблвыканкама Аляксея Гуйды і Пятра Белуся прааналізавалі ход падрыхтоўкі да «Дажынак».
– Міёры пераўтварыліся за апошнія гады, – падкрэсліў Ігар Пятровіч, разам з тым нацэліваў на нарошчванне тэмпаў работ: – Усё ідзе ў штатным рэжыме, вызначаны месцы, якія патрабуюць большай увагі, у тым ліку кантролю з боку ўлады, каб свята адбылося. «Дажынкі» – добрая магчымасць зрабіць раённы цэнтр чысцейшым і прыгажэйшым, але немалаважным з'яўляецца ўдзел жыхароў у навядзенні парадку.
На штабе разгледзелі таксама перспектывы развіцця раёна ў цэлым, у тым ліку кадравыя пытанні ў медыцынскай сферы.