Міёрскі раённы выканаўчы камітэт
Сёння ў канцэртнай зале «Віцебск» урачыста адзначаюць уладальнікаў прэміі «Чалавек года Віцебшчыны – 2025». Гэтага паважнага звання ўдастоены 53 прадстаўнікі розных сфер дзейнасці, якія ўнеслі значны ўклад у развіццё паўночнага рэгіёна Беларусі.
У урачыстым мерапрыемстве прымаюць удзел: старшыня Палаты прадстаўнікоў Нацыянальнага сходу Рэспублікі Беларусь Ігар Сергеенка, старшыня аблвыканкама Аляксандр Рагажнік, памочнік Прэзідэнта Рэспублікі Беларусь – інспектар па Віцебскай вобласці Уладзімір Юргевіч, старшыня абласнога Савета дэпутатаў Дзмітрый Дземідаў, члены Савета Рэспублікі, дэпутаты Палаты прадстаўнікоў, заслужаныя работнікі галін народнай гаспадаркі, ветэраны працы, дэлегацыі гарадоў і раёнаў Віцебшчыны.
Як падкрэсліў Аляксандр Рагажнік, чалавек працы заўсёды быў і застаецца галоўным багаццем дзяржавы дзякуючы прафесіяналізму і адданасці справе. На Віцебшчыне жывуць і працуюць працавітыя людзі з велізарным патэнцыялам.
– 2026-ы год – старт новага пяцігоддзя. Зацверджана праграма сацыяльна-эканамічнага развіцця нашай краіны на 2026-2030 гады. Перад намі стаіць шмат складаных, але важных задач, якія трэба будзе вырашаць разам. Асаблівую ўвагу варта надаць прамысловому комплексу, мадэрнізацыі аграрнага сектара і адраджэнню вёсак, пошуку новых кропак росту ў эканоміцы. Не застанецца без увагі турыстычны патэнцыял Віцебшчыны, яе прыродная ўнікальнасць і багатая культурная спадчына, – адзначыў кіраўнік вобласці і выказаў упэўненасць, што дзякуючы агульнай мэтавызначанасці і дысцыпліне мы здолеем пераадолець усе цяжкасці і зрабіць паўночны рэгіён камфортным і дабрабытным.
Перад пачаткам цырымоніі ўдзельнікі і госці азнаёміліся з выставай карцін сучасных мастакоў «Віцебскія музы» і экспазіцыяй традыцыйнага жаночага адзення паўночнага рэгіёна, прысвечанымі Году беларускай жанчыны.
У фойэ канцэртнай залы таксама прадстаўлена прадукцыя прадпрыемстваў Віцебскай вобласці.
Ганаровае званне «Чалавек года Віцебшчыны» прысуджана па пяці намінацыях: «Прамысловасць, гандаль і паслугі, фінансовая дзейнасць, малы і сярэдні бізнес», «Аграпрамысловы комплекс, ахова навакольнага асяроддзя, лясная гаспадарка», «Жыллёва-камунальная і дарожная гаспадарка, будаўніцтва і архітэктура, паліўна-энергетычны комплекс, сувязь, транспарт і камунікацыі», «Сацыяльная сфера (сацыяльная абарона насельніцтва, культура, адукацыя, навукa, спорт, ахова здароўя, моладзь)» і «Забяспечэнне законнасці і правапарадку, прадухіленне і ліквідацыя надзвычайных сітуацый, дзейнасць органаў мясцовага кіравання і самакіравання, грамадскіх арганізацый».
Цяперашняя цырымонія ўшанавання лаўрэатаў ужо сямнаццатая. За мінулы час уладальнікамі ганаровага звання сталі больш за тысячу дзвесце чалавек.