Міёрскі раённы выканаўчы камітэт

У Полацкім дзяржаўным каледжы УО «ВДУ імя П.М. Машэрава» пасля рэканструкцыі адкрыты музей гісторыі ўстановы адукацыі.

Значная падзея прымеркавана да Дня Кастрычніцкай рэвалюцыі і 85-годдзя прафесійнай адукацыі Беларусі.

У урчыстасці прынялі ўдзел старшыня Полацкага раённага выканаўчага камітэта Васіль Шылоў, прарэктар ВДУ імя П.М. Машэрава Ірына Семкіна, педагогі і вучні каледжа, духаўенства.

Гісторыя сучаснага каледжа сыходзіць каранямі ў 1872 год, калі ў Полацку адкрылася настаўніцкая семінарыя. На працягу яго існавання назва і статус змяняліся, але сутнасць заставалася нязменнай: тут рыхтуюць будучых педагогаў розных спецыяльнасцей.

У экспазіцыі музея прадстаўлены ключавыя этапы гісторыі адной з найстарэйшых устаноў адукацыі краіны. Тут захоўваюцца архіўныя матэрыялы, рэдкія дакументы, фотахроніка, шматлікія ўзнагароды, дасягненні ўстановы адукацыі, распавядаецца пра знакамітых выпускнікоў.

У межах адкрыцця музея педагогі і вучні каледжа пазнаёмілі прысутных з экспанатамі і асноўнымі этапамі развіцця і фарміравання ўстановы адукацыі, пачынаючы з адкрыцця настаўніцкай семінарыі да інтэграцыі з Віцебскім дзяржаўным універсітэтам імя П.М. Машэрава.

Васіль Шылоў падзякаваў кіраўніцтва каледжа за тое, што тут беражліва захоўваецца гісторыя ўстановы адукацыі, з пакалення ў пакаленне перадаюцца лепшыя традыцыі асветы моладзі.

Музей навучальнай установы быў створаны ў 1972 годзе да 100-годдзя Полацкага педагагічнага вучылішча імя Францыска Скарыны па ініцыятыве дырэктара вучылішча Пятра Пацея. У ходзе стварэння музея ў архівы, органы народнай асветы і былым выпускнікам было адпраўлена каля 2 тысяч лістоў. Шматлікія дакументы, фотаздымкі выпускнікоў і іх успаміны пра гады навучання далі магчымасць аднавіць гісторыю вучылішча і сабраць багатую экспазіцыю.

vitebsk-region.gov.by