Міёрскі раённы выканаўчы камітэт
«Урачыста клянуся!» – з гэтымі словамі ў Віцебску на плошчы Герба і Сцяга новае папаўненне вайсковай часткі 5524 прысягнула на вернасць Радзіме і беларускаму народу. Сваю клятву склалі таксама вучні ваенна-патрыятычнага клуба «Віцязь».
– Прысяга – гэта важная складовая ў выхаванні маладога пакалення. Дзякуючы гэтаму абраду прызывнік становіцца сапраўдным мужчынам, абаронцам сваёй зямлі, Айчыны. Рада заўважыць, што прысяга вайскоўцаў і выхаванцаў ваенна-патрыятычнага клуба адбылася на новай лакацыі Віцебска – плошчы Сцяга і Герба. Гэты ўрачысты момант запамінаецца хлопцам на доўгі час, – падкрэсліў старшыня аблвыканкама Аляксандр Субоцін.
Камандзір в/ч 5524 палкоўнік Аляксандр Усманаў распавёў, што на вернасць Радзіме прысягнулі 55 вайскоўцаў тэрміновай службы і 32 вайскоўцы, прызваныя для праходжання службы па кантракце.
– Хлопцы ўжо прайшлі агульнавайсковую і пачатковую ваенную падрыхтоўку. У далейшым пасля завяршэння вучэбнага збору іх чакае размеркаванне па падраздзяленнях. Вайскоўцы тэрміновай службы будуць размеркаваны ў Віцебск і Полацк. Тыя, хто прызваны для праходжання службы па кантракце – у Аршу, Глыбокае, Наваполацк, частка застанецца ў Віцебску для выканання службова-баявых задач, якія выконваюць унутраныя войскі згодна з законам, – адзначыў Аляксандр Усманаў.
Набраныя ўрачыста пакляліся быць адданымі беларускаму народу, непахісна выконваць Канстытуцыю Рэспублікі Беларусь, патрабаванні ваенных статутаў, загады камандзіраў і начальнікаў, мужна і самааддана абараняць незалежнасць сваёй краіны.
Сярод іх – Фарыд Навікаў, для якога абарона Айчыны – святы абавязак.
– Служба ў арміі выхоўвае сапраўдных мужчын, дысцыплінуе, удасканальвае фізічную падрыхтоўку. Сёння вельмі хвалюючы і ўрачысты момант для мяне і маіх таварышаў па службе. Кожны мужчына павінен прайсці гэтую школу, – падзяліўся новы вайскоўца.