Міёрскі раённы выканаўчы камітэт
«Тое, што было не са мной, памятаю…» Гэтак, словамі з вядомай песні можна перадаць уражанне ад выставы «Вялікі май Вялікай Перамогі», якая адкрылася ў Віцебску, у гандлёвым цэнтры «Трыё».
У экспазіцыю ўвайшлі работы, у якіх сучаснае пакаленне спрабуе перадаць перажыванні дзядоў і прадзядоў, якія выстаялі ў ваеннае ліхолле. Арганізатарамі выставы сталі віцебскае аддзяленне Беларускай партыі «Белая Русь» і ВДУ імя П. Машэрава.
– Гэты праект накіраваны на тое, каб як мага больш людзей успомнілі пра дні выпрабаванняў, якія выпалі на нашу краіну, пра абаронцаў Айчыны і сустрэлі дзень Вялікай Перамогі так, як павінны наследнікі пераможцаў, – адзначыла старшыня віцебскага абласнога аддзялення Беларускай партыі «Белая Русь», рэктар ВДУ імя П. Машэрава Валянціна Багатырёва.
На выставцы прадстаўлена больш за чатыры дзясяткі мастацкіх кампазіцый з розных куточкаў Віцебшчыны. Гэта работы, створаныя членамі «Белай Русі», вучнямі школ, выхаванцамі дзіцячых садоў. У экспазіцыю таксама ўвайшлі два праекты Наваполацкага гарадскога аддзялення партыі – «Мастак, які перамог фашызм» і «Шталаг 354». Апошні прысвечаны адной з трагічных старонак у гісторыі Вялікай Айчыннай вайны – лагера, арганізаванага фашыстамі на тэрыторыі ваеннага мястэчка Бараўуха-1, дзе з 1941 па 1944 гады змяшчаліся 29 тыс. воінаў Чырвонай арміі, 18 тыс. з іх загінулі.
Валянціна Багатырёва таксама расказала пра іншыя праекты «Белай Русі», прымеркаваныя да 80-годдзя Перамогі. У прыватнасці, пра «Дыктант Перамогі», які будуць пісаць у цягніку Мінск – Масква, абноўлены лічбавы музей, прысвечаны Пятру Машэраву, інтэрнэт-платформу, дзе сабраны ўспаміны ўдзельнікаў і сведкаў Вялікай Айчыннай вайны.