Міёрскі раённы выканаўчы камітэт
Сімвалічная акцыя «Ключ у другое стагоддзе» адбылася ля цэнтральнага ўваходу Віцебскай акадэміі ветэрынарнай медыцыны па выпадку 100-годдзя навучальнай установы.
Два ключі, якія звязалі пакаленні і адчынялі век таму дзверы тагачаснага ветінстытута, былі перададзены студэнтцы пятага курса Ксеніі Валюшко і студэнту першага курса Захару Шандрыкову. У акцыі прынялі ўдзел ганаровыя госці – першы намеснік старшыні аблвыканкама Генадзь Сабыніч і намеснік міністра – дырэктар дэпартамента ветэрынарнага і прадуктовага кантролю Міністэрства сельскай гаспадаркі і харчавання Беларусі Іван Смільгін.
Па словах рэктара ВАВМ Алены Гарловай, навучальная ўстанова з'яўляецца важнай часткай прадуктовай бяспекі краіны. Тут гатовяць урачоў ветэрынарнай медыцыны, якія адказваюць за якасць прадукцыі, якая трапляе на наш стол. Даследаванні і аналіз паказваюць, што 80 % выпускнікоў выбралі спецыяльнасць па пакліканні і душы. Алена Гарлова пажадала моладзі, каб ключы-артэфакты адчынялі ўсе дзверы на жыццёвым шляху.
У фойе ветэракадэміі была прадстаўлена экспазіцыя з фондаў музея і бібліятэкі навучальнай установы. Сярод дзясяткаў цікавых экспанатаў – дыплом аб заканчэнні ветінстытута Вячаслава Хаміча, які ўваходзіў у першы набор, рукапісны падручнік прафесара Мікалая Прозарава, даваенныя заліковыя кніжкі студэнтаў і шмат іншага.
Разам з ганаровымі госцямі студэнты-пяцікурснікі паклалі ў капсулу пасланне сваім роўеснікам з 2035 года. Згодна з усталяванай традыцыяй, выпускнікі ўпершыню сустракаюцца праз дзесяць гадоў пасля заканчэння навучальнай установы. Таму ўжо сфарміраваныя прафесіяналы і пачаткоўцы прачытаюць пасланне разам.