Міёрскі раённы выканаўчы камітэт
У гэтым годзе на «Славянскім базары ў Віцебску» будуць працаваць адразу тры лабараторыі — тэатральная, вакальная і інструментальная. Аб гэтым на прэс-канферэнцыі, прысвечанай падрыхтоўцы і правядзенню XXXIII Міжнароднага фестывалю мастацтваў «Славянскі базар у Віцебску», паведаміў генеральны дырэктар Цэнтра культуры «Віцебск», дырэктар форума, член Савета Рэспублікі Глеб Лапіцкі.
Міжнародны форум захоўвае адукацыйны вектар. «Акрамя нашай тэатральнай лабараторыі, вынікам работы якой за тры гады стала тое, што ў гэтым годзе тэатральную праграму на «Славянскім базары» адкрывае «Гамлет», яго вы ўпершыню пачуеце на беларускай мове. Гэта менавіта Аляксандр Аляксандравіч Бармак, які трэці год кіруе тэатральнай лабараторыяй — у гэтым годзе мы яе таксама рэалізуем разам з ГІТІСам. Далей пад апекай Тамары Сіняўскай з'явіцца працяг вакальнай лабараторыі, — расказаў Глеб Лапіцкі. — Нам падказалі, што мы крыху абаходзім увагай інструменталістаў. А інструменталісты Віцебска — гэта асобная каста, бо ў Віцебску самая моцная школа домры, беларускага нацыянальнага інструмента. Калі мы думалі, як гэта аб'яднаць, то зразумелі, што трэба яшчэ прыцягнуць рускі нацыянальны інструмент — балалайку. А лепшая школа балалайкі — у Гнесінцы (Расійская акадэмія музыкі імя Гнесіных. — Заўв. БЕЛТА)».
Пасля тэлефоннай размовы з рэктарам і асабістай сустрэчы бакі вырашылі — праекту быць. «Цяпер мы будзем праводзіць разам з Гнесінкай на базе нашага музычнага каледжа імя Соллертынскага інструментальную лабараторыю», — закончыў Глеб Лапіцкі.
Інструментальная лабараторыя ў гэтым годзе заработае на «Славянскім базары» ўпершыню. Падобныя праекты, паводле яго слоў, паказваюць, што гэты форум «не толькі пра танцы, забаўкі і да таго падобнае, але і выстаўковая, тэатральная праграма «Кукольнага квартала», велізарная філарманічная праграма».
Сярод членаў журы будзе калумбійска-амерыканская піаністка Пілар Лейва, кандыдатуру якой прапанавалі партнёры віцебскага фестывалю ў Калуге. Глеб Лапіцкі адзначыў, што гаворка ідзе пра конкурс артыстаў, у журы якога ёсць прадзюсары, харэографы, інструменталісты, і
яны ў комплексе павінны ацаніць артыста, які, у сваю чаргу, павінен «захапіць» шасцітысячны амфітэатр.
«Славянскі базар» — адзіны фестываль у свеце, для якога няма межаў. На адрозненне ад некаторых іншых праектаў, куды запрашаюць або не запрашаюць, мы запрашаем усіх», — адзначыў дырэктар форуму, дадаўшы, што гэта пацвярджае і нязменны дэвіз фестывалю «Праз мастацтва — да міру і ўзаемаразумення». 5 ліпеня пачынаецца праграма «Славянскага базару» з майстар-класа Пілар Лейвы ў Мінску ў Беларускай дзяржаўнай акадэміі музыкі для лепшых піяністаў краіны па яе аўтарскай метадыцы.
Прэс-канферэнцыя прайшла ў Медыяцэнтры Віцебскай вобласці пры ўдзеле прадстаўнікоў СМІ абласцей краіны і Мінска, а таксама рэгіёнаў Расіі. Мерпрыемства дало старт міждзяржаўнаму прэс-туру, прысвечаным падрыхтоўцы і правядзенню XXXIII Міжнароднага фестывалю мастацтваў «Славянскі базар у Віцебску». У праграме — наведванне асноўных пляцовак форуму, у тым ліку Летняга амфітэатра, Алеі лаўрэатаў спецыяльнай узнагароды Прэзідэнта Беларусі «Праз мастацтва — да міру і ўзаемаразумення», выстаўковай залы «Духаўскі круглік» з прадстаўленымі ў ёй першай «базарнай афішай» і акрэдытацыямі знакамітых зорак, а таксама абноўленага канцэртнага зала «Віцебск». «Славянскі базар» у гэтым годзе пройдзе з 9 па 15 ліпеня.