Міёрскі раённы выканаўчы камітэт

Рэалізуемы ў Віцебскай вобласці праект «Васільковы край» аб'яднае больш за 300 ключавых турыстычных аб'ектаў рэгіёна. Аб гэтым карэспандэнту БЕЛТА паведамілі ў упраўленні спорту і турызму Віцебскага аблвыканкама.

«Зараз праект рэалізуецца ў дванаццаці раёнах вобласці, дзе размяшчаецца прыкладна 150 васількоў з QR-кодамі, гэта значыць на 150 турыстычных аб'ектах. Калі дзейнасць «Васільковага краю» распаўсюдзіцца на ўвесь рэгіён, ён ахапіе больш за 300 аб'ектаў, — растлумачылі ў упраўленні. — Акрамя таго, у межах гэтага праекта мы хочам распрацаваць турыстычны брэнд, звязаць яго з васільком, бо нас нават на міжнародных выставах штогод распазнаюць па прымацаваных да адзення васільках (такія элементы абавязкова павінны быць у стылі нашай дэлегацыі). І мы гэты стыль прасоўваем. Гэта фішка Віцебскай вобласці».

Турысты ўжо паспелі ацаніць зручнасць выкарыстання васількоў з QR-кодамі, сканаваўшы якія можна пазнаёміцца з аб'ектам і яго гісторыяй. Справа ў тым, што чалавеку дастаткова проста спампаваць праграму для іх зчытвання. Сканаваць і прачытаць інфармацыю карыстальнік можа без падключэння да інтэрнэту. Такі фармат асабліва спадабаўся індывідуальным падарожнікам.

Раёны, якія не ўдзельнічалі ў пілотным праекце «Васільковы край», тэрмін рэалізацыі якога — 2021–2023 гады, у бліжэйшы час распрацуюць і размясцяць васільковыя гіды. «Размясціць васількі — гэта не праблема. Справа ў тым, каб якасна апрацаваць тэкст. У ім павінна быць не статыстыка, а мастацкі аформленая інфармацыя, цікавая для турыста. Ён жа не будзе стаіць і лістаць. Павінна быць так: мінімум тэксту — максімум інфармацыі. Трэба будзе дапамагаць раёнам у апрацоўцы такой інфармацыі», — адзначылі ў абласным упраўленні спорту і турызму.

Крыніца: vitebsk-region.gov.by