Міёрскі раённы выканаўчы камітэт

7 снежня адбылося сумеснае пасяджэнне прэзідыума Віцебскага абласнога Савета дэпутатаў і Віцебскага аблвыканкама, парадкам дня якога было «Стварэнне выбарчых камісій па выбарах дэпутатаў у адзіны дзень галасавання 25 лютага 2024 года».

– На пасяджэнне запрошаны кіраўнікі камітэтаў, упраўленняў і аддзелаў аблвыканкама і абласных арганізацый, прадстаўнікі палітычных партый і іншых грамадскіх аб'яднанняў, прафсаюзаў, якія вылучылі сваіх прадстаўнікоў у склад абласной і акруговых выбарчых камісій, – адзначыў, адкрываючы пасяджэнне, старшыня аблвыканкама Аляксандр Суботын. – Нам неабходна разгледзець пытанне стварэння Віцебскай абласной і акруговых выбарчых камісій.

Адзначыўшы, што ў нашай краіне будзе праводзіцца адзіны дзень галасавання, Аляксандр Суботын падкрэсліў, што гэта дазволіць пазбегнуць пастаяннага выбарчага працэсу, які ствараў пэўныя цяжкасці для дзяржавы і для грамадства. Яшчэ да старту выбарчай кампаніі органамі мясцовага кіравання і самакіравання вобласці была праведзена грунтоўная падрыхтоўчая работа па вызначэнні колькасці і межаў выбарчых акругоў, сярэдняй колькасці выбаршчыкаў на акругу.
– Сёння нам трэба вырашыць адно з ключавых пытанняў: аб стварэнні Віцебскай абласной і акруговых выбарчых камісій, – акцэнтаваў кіраўнік абласной улады. – Гэта рашэнне павінна быць абгрунтаваным і адказным. Бо гэтыя камісіі не толькі арганізуюць правядзенне выбараў, але і ажыццяўляюць кантроль за захаваннем выбарчага заканадаўства ў нашым рэгіёне. Склады камісій павінны быць падобраны па сваіх службовых, маральных і чалавечых якасцях такім чынам, каб паўнамоцтвы камісій былі рэалізаваны ў поўным аб'ёме і ў тэрміны, вызначаныя Каляндарным планам па выбарах.
5 снежня завершылася вылучэнне ў склад абласной і акруговых выбарчых камісій. Усе суб'екты, якія валодаюць у адпаведнасці з Выбарчым кодэксам правам вылучаць сваіх прадстаўнікоў у склад абласной і акруговых выбарчых камісій, скарысталіся ім.

Старшыня абласнога Савета дэпутатаў Уладзімір Таранцьеў нагадаў, што пастановай ЦВК на тэрыторыі Віцебскай вобласці створана 14 выбарчых акругаў для абрання дэпутатаў Палаты прадстаўнікоў Нацыянальнага сходу Рэспублікі Беларусь восьмага склікання. Віцебскім абласным Саветам дэпутатаў створана 60 выбарчых акругаў для выбараў дэпутатаў абласнога Савета дэпутатаў. Згодна з новым выбарчым заканадаўствам, выбары дэпутатаў Палаты прадстаўнікоў і абласнога Савета праводзяць адны і тыя ж акруговыя камісіі.

– У склад Віцебскай абласной выбарчай камісіі вылучана 13 чалавек, з іх палітычнымі партыямі і іншымі грамадскімі аб'яднаннямі – 11 чалавек (85 %), у тым ліку палітычнымі партыямі – 3 чалавекі (23 %). Працоўнымі калектывамі – 2 чалавекі (15 %).
Усяго ў склад 14 акруговых выбарчых камісій вылучана 182 чалавекі, з іх палітычнымі партыямі і іншымі грамадскімі аб'яднаннямі – 141 чалавек (77 %), у тым ліку палітычнымі партыямі – 22 чалавекі (12 %), працоўнымі калектывамі – 4 чалавекі (2 %). Шляхам збору подпісаў – 37 чалавек (20 %).
Абласная і акруговыя выбарчыя камісіі фарміруюцца ў колькасці ад 9 да 13 членаў. Члены аблвыканкама і прэзідыума абласнога Савета дэпутатаў прагаласавалі за лікавы склад камісій у складзе 13 чалавек.

Крыніца: vitebsk-region.gov.by