Упершыню беларускі клуб заваяваў Еўра-Азіяцкі Кубак Дружбы па хакеі. І гэта "Віцебск"!

У фінале нашы землякі сустракаліся з расійскай камандай "Тарпеда-Горкі". "Віцебск" у першым перыядзе закінуў дзве шайбы (Вячаслаў Іпатаў і Яўген Астанкоў). Другі перыяд прайшоў без галоў, у заключнай трэці расіяне забілі першы адказны гол. Але больш наша каманда дапусціць суперніку не дазволіла, гульня завяршылася з лікам 2:1.

"Віцебск" зрабіў тое, што не ўдалося за гісторыю турніру іншым топавым камандам беларускага чэмпіянату - "Юнацтву", "Металургу" і іншым.

Нагадаем, нашы землякі на папярэдняй стадыі турніру занялі першае месца, абыграўшы казахстанскі "Намад", расійскі "Хімік" з Падмаскоўя і "Гомель". У паўфінальным паядынку вырашальнага этапу віцябляне перамаглі "Юнацтва".

Адзначаем, што ў складзе суперніка па фінале нямала гульцоў з вопытам гульні ў КХЛ (другой па сіле хакейнай лізе свету). Тым больш каштоўная перамога нашых землякоў.

Аляксандр Субоцін павіншаваў «Віцебск» з перамогай у Еўразійскім Кубку Дружбы ў сваім акаўнце instagram.

- Віншую нашу каманду, нашых «мядзведзяў» з ашаламляльнай перамогай!!!! Мы ўсе хварэлі за вас і даказалі, што можам усё і нават больш!! Мы разам перамаглі цыклон, перамаглі ў хакеі і, спадзяюся, гэтым толькі адкрылі серыю перамог новага года!

Па выніках турніру былі вызначаны лепшыя гульцы. Прадстаўнікі "Віцебска" ўдастоіліся прызнання ў трох намінацыях. Прычым адразу ў дзвюх адзначаны Раман Бабарыка - ён прызнаны лепшым брамнікам і самым каштоўным гульцом. Лепшым абаронцам названы Сяргей Сафін-Трагубоў.

Каманда паўночнай сталіцы заваявала трэці трафей у сваёй гісторыі - усе за апошнія гады. Нагадаем, да гэтага "Віцебск" двойчы выйграваў Кубак Салея.

Фота прэс-службы федэрацыі хакея Беларусі.