Тварыце, натхняйце, падарожнічайце! 15 траўня стартуе V Рэспубліканскі конкурс сацыяльнай рэкламы «#ПазнайБеларусь»

Міністэрства спорту і турызму і Нацыянальнае агенцтва па турызме пры падтрымцы Міністэрства інфармацыі, Міністэрства культуры і Міністэрства адукацыі праводзяць V Рэспубліканскі конкурс сацыяльнай рэкламы «#ПазнайБеларусь».

«#ПазнайБеларусь» – ваш шанец унесці ўклад у развіццё ўнутранага турызму, прыцягнуць увагу да ўнікальных куткоў нашай краіны і паказаць, што Беларусь – гэта не толькі «бульба», але і неверагодная гісторыя, багатая культура і захапляючая прырода.

Што такое #ПазнайБеларусь?

Гэта платформа для творчай самарэалізацыі, дзе кожны можа выказаць сваю любоў да Беларусі праз сацыяльную рэкламу. Наша мэта – натхніць людзей на падарожжы па роднай зямлі, адкрыць для сябе невядомыя маршруты і ўбачыць знаёмыя месцы па-новаму.

Задачы конкурсу

Стварэнне пазітыўнага іміджу падарожжаў па Беларусі.
Прыцягненне ўвагі да турыстычных рэсурсаў і ўнікальных аб'ектаў.
Папулярызацыя багатай гісторыка-культурнай і прыроднай спадчыны Беларусі.
Залучэнне грамадзян у сацыяльна-культурнае жыццё краіны.
Раскрыццё творчага патэнцыялу ўдзельнікаў.
Пашырэнне магчымасцей для творчай самарэалізацыі падарожнікаў.

3 намінацыі

1. «Слоган»: прыдумайце кароткі, запамінальны дэвіз, які стане сімвалам беларускага турызму!

2. «Плакат»: стварыце яркі, прывабны візуальны вобраз, які захочацца ўбачыць на білбордах па ўсёй Беларусі.

3. «Відэаролік»: зніміце натхняльнае відэа пра свае падарожжы па Беларусі або раскажыце пра турыстычныя магчымасці краіны (пад намінацыі: «Відэаролік падарожніка», «Відэаролік арганізацыі»).

Хто можа стаць удзельнікам?

Абсалютна ўсе! Усе, хто любіць Беларусь і ўмее крэатыўна думаць! Фізічныя асобы (уключаючы дзяцей і моладзь), юрыдычныя асобы і індывідуальныя прадпрымальнікі – мы чакаем вашы заяўкі!

#ПазнайБеларусь у лічбах: конкурс, які заваёўвае сэрцы!

З кожным годам конкурс «#ПазнайБеларусь» набірае абароты! У 2024 годзе быў усталяваны новы рэкорд – 1315 заявак!

I Конкурс – 2021 год – 605 заявак

II Конкурс – 2022 год – 507 заявак

III Конкурс – 2023 год – 892 заявки

IV Конкурс – 2024 год – 1315 заявак

Лідарам па актыўнасці ў 2024 годзе стала Магілёўская вобласць – 232 заяўкі! У рэгіёнах ведаюць толк у сацыяльнай рэкламе!

Самай папулярнай намінацыяй застаецца «Слоган» – 735 заявак! Лаканічнасць – сястра таленту!

У конкурсе сацыяльнай рэкламы ўдзельнічаюць усе напрамкі турызму: установы культуры, адукацыі, фізкультурна-спартыўныя комплексы, аб'екты прамысловага і медыцынскага турызму, ТІЦ і іншыя арганізацыі. Разам мы зробім беларускі турызм яшчэ лепш!

Трэнды 2024 года: штучны інтэлект і нацыянальны каларыт

Сучасныя тэхналогіі і вечныя каштоўнасці – так можна ахарактарызаваць працы ўдзельнікаў конкурсу. З дапамогай ШІ ў 2024 годзе былі прадэманстраваны новыя вобразы Беларусі. Цікава, ці ўбачым мы сёлета зубра, які кіруе БЕЛАЗам? А калі сур'ёзна, то Беларусь у большасці ўдзельнікаў асацыюецца з такімі напрамкамі:

Прамысловасць і вытворчасць:Белавія, Гомсельмаш, МТЗ, БЕЛАЗ – моц і інавацыі!
Прырода:буслы, зубры, васількі, журавіны, журавы – прыгажосць і багацце роднай зямлі!
Культура і традыцыі:арнаменты, народныя строі, Марк Шагал – спадчына, якой мы ганарымся!
Славутасці:замкі, палацы, сядзібы – сведкі гісторыі і натхненне для будучых пакаленняў!

Натхніліся? Тады ўдзельнічайце ў конкурсе #ПазнайБеларусь і раскажыце пра сваю Беларусь!

Для ўдзелу неабходна запоўніць форму па спасылцы:https://forms.gle/uSbjB8QvmPPCr1qM6.

Тэрміны правядзення конкурсу:

з 15 мая па 10 верасня – аб'яўленне конкурсу, стварэнне экспертнай камісіі і конкурснага журы, прыём заявак на ўдзел у конкурсе і рэгістрацыя конкурсных работ;
з 11 па 20 верасня – аналіз і ацэнка конкурсных работ, правядзенне пасяджэнняў экспертнай камісіі і конкурснага журы (дзе будуць ацэнены крэатыўнасць, арыгінальнасць, навізна ідэі, аргументаванасць і глыбіня раскрыцця зместу заяўленай тэмы, агульнае эмацыйнае ўражанне, этычнасць конкурснай работы, дакладнасць і даступнасць стылю выкладання), падвядзенне вынікаў конкурсу;
з 21 па 30 верасня – падрыхтоўка да цырымоніі ўзнагароджання пераможцаў конкурсу. Аб'яўленне, узнагароджанне пераможцаў конкурсу памятнымі дыпломамі і падарункамі ад партнёраў адбудзецца ў рамках правядзення Міжнароднай навукова-практычнай канферэнцыі «Перспектывы развіцця турызму ў сучасных умовах: сусветныя тэндэнцыі і рэгіянальныя кантэксты», прысвечанай Сусветнаму дню турызму (пра месца і час правядзення будзе паведамлена асобна).